الى من يحب العراق ادخلو بسرعه

حط ايدك بديه وصير فاعل خير
وخلني حزام ظهرك ساعة الشده
واترك حجي الطايش شنهي كال فلان
وباب المنه ريح بلا نفع سده
واذا مسك العوز وساعتك بالضيج
وماتكدر تصفك بيدك الوحده
حشمني تعال اندهني كلي وياك
تلكاني جبل وبخاطري اتحده
جيلاتي يثورن كبلك بساعات
افرزها الزلم وتغيضني الشرده
وادج بين الرصاص وهوستي التحرير
واتنومس بطكهن من تطك وحده
عراقي وغيرتي اتمثلت غيرة كاع
ماترضه المساحي اتجيسها بذله
ولا تنتخي بغيري ولا تحشم الجار
ماشيلن حقد واغفرلك الزله
وحط جفك بجفي انصير يد العون
والحمل اليطيح انكومله انعدله
تعال اقره هويتي وشوفها شمكتوب
تلكاها عراقي ومن ارض دجله
يجمعنا الوطن والغيره والنوماس
والدم والمضيف وريحة الدله
مو شغلة جناسي ؟ وانته من يادين !
والمن انه تابع يانبي ومله
المهم اسلام كلنه وراينه التوحيد
ونموت عله حكنه ونسحك العله
ربتنه المضايف والجبل والهور
وكبرنه الشرف وحجاية العدله
كبل ماعلمونه الطائفيه شلون !
هسه منين اجت وانطيتها المهله
كسر بجمع بالك لا تاثر بيك
والواجب عليك بصبرك تحله
تعال وخل احشم النجف والانبار
والبصره وصلاح الدين والحله
والعماره وشمال والوطن من اربيل
وديالي وفرات ايشم عذب دجله
وذي قار الحبيبه القادسيه تصيح
وتكريت السماوه بواسط اتسله
وافض همومي وابجي بنص حضن بغداد
والفلوجه جرح لكربله تشله
وتتصافه الكلوب وخل نشد حزام
ظهر الوطن نفزع نشرك بحمله
ظهر الوطن نفزع نشرك بحمله

تحياتي

مصطفى الراوي